第一次做殺手（下）
上集：https://bit.ly/2XSbmdx
總之，無論我用咩方法都好，都要拍片影到係我做嘅，再Send畀孤獨的狼，先可以收埋尾數。
呢個要求都好合理，但我視察環境，制定計劃嗰陣，愈諗愈驚。
隻芝娃娃雖然細隻，但佢吠得好大聲，我想像到，佢嬌小嘅外表下，應該係有一顆勇猛嘅心。
雖然我冇見過芝娃娃從圍欄內跳出嚟，但如果我丟舊有毒嘅肉落去，佢會唔會感受到我嘅殺意，跳出嚟咬我？
又或者佢肯食舊肉，但咬咗一啖就發現有毒，臨死前激發潛能，跳出嚟同我同歸於盡？
雖然佢好細隻，但佢都咬傷過獨孤的狼，我絕對唔可以輕視對手。
我喺村屋附近躊躇咗好耐，都諗唔到一個完美嘅方法。
呢個時候，村屋道門開咗，有個人行出嚟，我估應該係芝娃娃嘅主人。
佢望向我，大喝一聲：「喂，你係邊個？鬼鬼祟祟喺度做咩？」
「我……」我努力諗緊答案嘅時候，突然間諗出一條絕世好橋！
我唔敢殺隻芝娃娃，但如果我同佢主人傾掂數，分廿萬畀佢，我哋一齊拍條片，扮殺咗隻芝娃娃，咁咪可以呃到孤獨的狼條尾數？
雖然咁搞法，我只可以收到三十萬，但勝在完全冇風險，唔駛驚俾狗咬、唔駛驚主人報復，簡直係完美。
我鼓起勇氣，向主人提出呢個計劃。
主人半信半疑，問：「錢呢？」
「我未有，要拍咗片先有。」我答。
主人嗤之以鼻：「咁我點知你係咪玩我？」
一番爭論後，我將我收到嘅五萬蚊訂金，忍痛畀咗主人先。
拍片嘅過程好順利，主要係因為，主人之前已經教識隻芝娃娃「扮死」。
我將一舊冇毒嘅肉丟畀芝娃娃，主人偷偷畀指令，叫佢扮死，咁就拍完。
我終於理解，點解現代人教狗指令，會有埋「扮死」，原來真係有先見之明。
之後，主人仲收埋芝娃娃入屋，話費事僱主嚟打聽。
萬事俱備，我將條片Send畀孤獨的狼。
但係，孤獨的狼收到條片後就消失咗，走咗我尾數，一啲信譽都冇！
我唔止一蚊都冇賺到，仲要應付芝娃娃主人嘅追數。
更糟糕嘅係，過幾日，我被拘捕，懷疑我虐畜，證據就係我「殺」芝娃娃嗰條片。
舉報人係我嘅前女友詩詩，佢話我虐畜後，Send咗呢條片畀佢。
我恍然大悟，原來詩詩就係孤獨的狼，佢故意話要請殺手，就係想拎到我虐畜嘅證據。
好彩，芝娃娃根本一啲事都冇，所以我都冇被入罪。
事後，我去搵詩詩，問佢點解要咁樣害我。
「廢柴，你以前點對我啊……」詩詩數咗一輪我嘅衰嘢。
唉，感情嘅爭執，公說公有理，婆說婆有理，我同佢爭論咗一陣，當然唔會有結果。
我更好奇嘅係：「就算你想報復，你點解會拎幾萬蚊『落訂』？你唔怕我收咗錢唔理你？」
如果唔係嗰幾萬蚊，我都唔會信佢。
「哼，我最清楚你係咩人，自以為是，我讚你兩句，話你係殺手話你好型，你一定飄飄然啦。」
詩詩答：「再講到五十萬，你一定好想要錢。」
我又問：「咁隻芝娃娃呢？同你有咩仇口？」
「嗰日路過見到，佢大聲吠我，我見佢唔係養喺屋內，諗住方便你殺嘛。」詩詩咁樣講。
唉，詩詩為咗害我，真係深謀遠慮。
我忍唔住問：「咁你點解唔叫我去殺人？殺人罪名更大。」
詩詩嗤之以鼻：「車，你雖然自以為是，但你骨子裡都係一個廢柴，你點敢殺人？」
「我都唔敢殺狗啊……」我下意識講咗一句。
詩詩嘅表情瞬間變得羞惱，然後佢唔肯再同我講嘢，轉身就走。
事後，我開始諗，我到底係唔係一個廢柴？
我隨隨便便就相信一個網友，打算去犯法，再Send埋犯罪證據畀人。
或者，我真係有啲廢。
正因為我細膽，所以就算我中咗伏，都唔敢殺隻狗，所以我冇被控虐畜。
傻人有傻福，有時候，廢人都有廢福。
即使你做唔到大事，但至少，闖禍嘅時候，都闖唔出大禍啊。
－完－
將專頁設定為「搶先看」/ "See first"，最新故仔馬上睇！
我嘅職業係：恩人：https://goo.gl/5eiUb6
大俠好窮：http://bit.do/ePkbC
#短故 #短篇 #小說 #陳美濤 #廣東話 #粵語 #tomatochan #第一次做殺手
Search